Hann á afmæli hann Jesús...

Kæru vinir, vandamenn og aðir lesendur:

Miklar hugsanir og hreint hjarta - um það skyldum vér biðja Guð
Goethe

Gleðileg jól !

 

Birna tekur til sinna ráða

Birna Björt ákvað skömmu fyrir jól að mála herbergið sitt.  Hún reif allt út úr herberginu og hófst þegar handa.  Keli bróðir kom til hjálpar og saman slettu þú slatta af málningu á veggi og víðar.  Þegar þetta er skrifað er ekki en séð fyrir endan á þessu málningarupphlaupi Birnu.

Bara smákökur

Fyrsti desember markar upphaf smákökutímabilsins, sem stendur nánast óslitið fram yfir áramótin eða í 30 - 40 daga.   Þetta munu vera um 10 % af árinu.  Sem sagt 10 % af árinu borðar maður næstum smákökur uppá hvern dag.  Það virðast vera endalaus tilefni til þess.  Smakka aðeins þegar er bakað, bjóða öðrum að smakka þegar þeir koma í heimsókn, fara í önnur hús og smakka aðeins á smákökum þar, gleypa piparkökur á biðstofum, smakka nýjar tegundir á kynningum í verslunum og framvegis.  Svo má ekki gleyma öllum "slúttunum" ; það eru litlu jólin á leikskólanum í grunnskólanum og í vinnunni.  Svo hjá kórum og félögum stórum sem smáum.

Já í hvert sinn sem maður stingur upp í sig smáköku segir maður við sjálfan sig; "bara núna"  en á einhvern óskiljanlegan hátt verður þetta nánast upp hvern dag í rúman mánuð.  Og það undalegasta af öllu í þessu sambandi er að maður verður hreint ekkert saddur af smákökum og hreint ekkert leiður á þeim.  Maður maular á þeim í tugavís, helst að tóm föt og diskar fái mann til að hætta án þess að vera dónalegur.

Jæja...sem sagt núna er smákökutímabilið á árinu.

Jólaundirbúningur

Skrýtið hvað það er margt sem ekki má með neinu móti sleppa fyrir jólin.  Það má ekki sleppa að skrifa jólakortin, ekki sleppa því að skreyta með seríum, ekki gleyma að baka, ekki gleyma að þrífa, ekki gleymna að kaupa græanar baunir, ekki gleyma malti og appelsíni og ekki gleyma að kaupa gjafir.

Engin jól ef eitthvað gleymist.  Þannig verður þetta eins og lífróður þar sem markið er að komast yfir allt það sem ómissandi fyrir jólin.  Eins gott að að maður er í góðu formi.  Þolir álag og vökur.  Og eins gott að manni er gefð jafnaðargeð.

Jæja...best að hætta að blogga...það má nefnilega sleppa því...og halda áfram að skrifa á jólakortin.

Hotel Baron

Ágætt einfalt hótel. Við Gugga ákváðum að taka sólarhringshlé frá amstri hversdagsins í desember og skella okkur eina nótt á hótel.  Og hér erum við í alvarlegri hvíld.  Ætlum að fara út að borða saman á eftir Caruso (hérumbil rétt stafsett hugsa ég).

Annars er að skella á einhver snjóstormur, sýndist okkur þegar við löbbuðum Laugarveginn rétt áðan.  Þá er nú notarlegt að hreiðra um sig á hótelherbergi með portvín og góða bók.

Marmaris var það !

Þá er fjölskyldan búin að ákveða hvert hún fer næsta sumar.   Hvorki meira né minna en til Asíu; nánar tiltekið til Marmaris í Tyrklandi.  Hljómar mjög spennandi.   Hef heyrt í nokkrum sem þangað hafa farið og þeir eru á einu máli um að þarna sé bæði gott og skemmtilegt að vera.  Svo nú er búið að bóka 14 daga ferð fyrir sex frá og með 29.júní. 

Þrír bæjarstjórar á launum í Árborg

Þá höfum við fengið nýjan vinstrisinnaðan meirihluta í Árborg.   Ragnheiður Hergeirsdóttir verður bæjarstjóri og eflaust góður sem slíkur.  Missum hana reyndar því miður í staðin af lista Samfylkingarinnar hér í Suðurkjördæmi.  Ef samstarfið í fyrverandi meirihluta var stirt þá var um að gera að hætta þessu og prufa að mynda nýjan meirihluta.  Mikilvægt að það séu starfhæfir flokkar sem vinna saman.

Hinsvegar ef þessi meirihluti lendir í vandræðum og enn og aftur kemur nýr bæjarstjóri verður það fjórði bæjarstjórinn sem fer á laun, en innan bráðs verða þeir þrír á launum í Árborg;  Einar Njálsson, Stefanía Karlsdóttir og Ragnheiður Hergeirsdóttir.

En ég óska nýjum bæjarstjóra og nýjum meirihluta til hamingju með meirihlutasamstarfið.

Gugga búin á Dale Carnegie

Síðastliðið fimmtudagskvöld lauk Gugga 12 vikna námskeiði hjá Dale Carnegie.  Þetta var sérstakt leiðtoganámskeið ætlað konum.   Mér var boðið að vera viðstaddur sem gestur síðasta kvöldið á námskeiðinu.  Það var mjög gaman að fylgjast með dagskrá kvöldsins og í raun lærdómsríkt.  Þarna mátti sjá hverja konuna á fætur annarri leika við hvern sinn fingur í framsögn og tjáningu.  

Guggu gekk nátturulega bara vel og í samanburði við allar hinar konunar var ekki annað hægt en að vera stoltur að því að vera maðurinn hennar.

Annað sætið

Keli hélt á sitt fyrsta júdómót í gær (sunnudag) í Reykjavík.  Hann hefur nú ekki æft lengi og er með hvíta beltið, sem er víst neðst í erfiðleikastiganum.  Keli glímdi ekki margar glímur á mótinu, en hafnaði engu að síður í öðru sæti í sínum þyngdarflokki.  Hér til hliðar má sjá hann í glímutökunum.

Annars er furðu skemmtilegt að horfa á glímu.  Hlutirnir gerast hratt og óvænt og hin besta skemmtun.  Íslensk glíma er mun daufari og tilþrifaminni öllj í samanburði við júdóið.

Allt er þá þrennt er

Þá er komið að elsta drengnum.  Keli og Alexsander tróðu upp á árshátíð 10. bekkjar á Hótel Selfossi í gær með nokkur lög.   Þetta var frumraun þeirra saman á sviði og tókst þeim vel upp.

Eitt laganna fylgir hér með í myndbandi (sjá til hliðar fyrir neðan könnunina )