Haraldur Bragason

Í dag fór fram útför Haraldar Bragasonar (Halla), en hann var tónlistarkennari hér við Auðarskóla í Dölum.   Varð bráðkvaddur 22.sept.  Hans er sárt saknað um allt héraðið.

Jæja það er tómlegt framundan í tónlistarkennslunni...allavega í bili.

Áfram Össur

Ég er ánægður með Össur.  Hann heldur sínu striki og virðist hafa mikið að gera.  Hef trú á að hann komi okkur alla leið í Evrópusambandið.  Áfram Össur.

Össur ávarpaði allsherjarþing SÞ

Bráðum komið ár - og litlu nær

Nú er næstum því komið ár síðan bankakerfið íslenska hrundi.  Hafi maður kviðið þessu komandi ári eftir hrunið í fyrra...já þá er það skyndilega bara að verða liðið.   Og sannarlega hefur það verið erfitt fyrir fjölda fólks.

Allt þetta ár hefur hinsvegar verið afar erfitt að átta sig á hvað er rétt og hvað er rangt í mati fólks á stöðunni og spár fram í tímann hafa verið misvísandi.  Þetta birtist manni þrátt fyrir að gríðarleg vinna hafi farið fram á því að greina stöðu banka, meta horfur og efnahagsvanda.  Svo fór allt sumarið í að ræða og greina Icesave stöðuna.

Það er í raun skrýtið að eftir ár...er maður litlu nær eftir alla þessa vinnu og umræðu.

Byggingarverktaki óskast í Búðardal

Á gullaldarárum verktaka náðu þeir að byggja svo mikið af húsnæði að núna standa einhver þúsund íbúða tilbúinnar og  tómar og annaðeins er óklárað.   Verktakarnir höfðu að sjálfsögðu mestan áhuga á svæðum þar sem þennsla var og uppgangur í atvinnulífi.

Í Búðardal var lítið byggt af húsum á þessu tímabili en nokkuð þó.  Fólk fluttist í þau strax og nú í kreppunni hefur atvinnuleysið ekki náð til Dala og því enginn að flytjast burtu vegna þess.  Þvert á móti hefur verið nokkur aukin ásókn í að komast í húsnæði í Búðardal. 

Húsnæðisskorturinn er því allverulegur í Búðardal og nágrenni.  Leiga á minni íbúðum fer yfir 100.000 kr og afarlítið af húsnæði í byggingu og ekkert til sölu.

Hefur ekki einhver byggingarverktaki áhuga á því að byggja hús í Búðardal ? 

Fyrstu næturgestirnir

Nú í dag koma Birna Björt og Gulla tengdamamma í heimsókn í Búðardal og ætla að vera eitthvað hjá okkur í vikunni.  Gestirnir verða að gera sér að góðu að gista innan um kassa.

Á laugardag kom hvolpurinn Erpur til okkar frá Selfossi.  Honum er reyndar lítið svefnsamt og hefur haldið okkur sæmilega óúthvíldum undanfarnar nætur.

Töskubúskapur

Við erum búin að flytja búslóðina vestur í Búðardal.  Hinsvegar erum við ekki farin að vera í húsinu ennþá og höfumst við á Brunná.  Þannig má segja að við séum næstum með allt í töskum eða kössum þessa dagana.  En þessu fyrirkomulagi mun að öllum líkindum ljúka á morgun.

Fyrirmyndarbörn

Mikið var þægilegt að koma á Víðivellina eftir viðstöðulausan akstur úr Dölum.   Á móti manni var tekið með rjúkandi heimagerðri pissu.  Eldri börnin eru að standa að búskap sínum á Selfossi með myndarbrag.

 

Ljósmyndasamkeppni

Morgunblaðið hefur í sumar staðið fyrir skemmtilegri ljósmyndasamkeppni.  Sökum þess hversu frjálslegar reglurnar eru þá senda fjölmargir inn skemmtilegar og fjölbreytilegar myndir.  Á hverjum degi er síðan valin mynd dagsins og oft á tíðum eru valdar afar skemmtilegar augnabliksmyndir þar sem ekki hefur þurft neitt til nema venjulega manneskju með venjulega myndavél.  Í lok sumarsins eru valdar bestu myndirnar og veit vegleg verðlaun.

Ég fer oft inn á vefinn og skoða þar myndir, t.d rakst ég á þessa stórgóðu mynd af Jökulárslóni í óvenjulegum búningi.  http://www.mbl.is/mm/folk/ljosmyndasamkeppni/vikan.html?week=35

Styttist í nýtt heimili

Nú erum ég, Gugga og Rikki búinn að vera á ferðinni vestur í Dali og svo á Selfoss um helgar í nokkrar vikur.  En nú hyllir undir að við getum farið að flytja búslóðina vestur í Búðardal.  Við búumst við að í næstu viku eða um næstu helgi verðum við flutt.

Eldri börnin verða því líka eflaust fegin, því eins og er þá er allt í kössum og drasli viku eftir viku hér á Viðvöllunum á Selfossi.

Döpur áhersla

Það er gleðiefni að fá góðar og jákvæðar fréttir reglulega.  Slíkar fréttir hafa þó ekki fengið náð fyrir augum ritstjóra og fréttastjóra undanfarna mánuði, heldur hafa næstum allir fréttatímar og fréttasíður verið undirlagðar af leiðindarfréttum af fjármálum.  Þessi ágæta verksmiðja, sem hér er fjallað um,  rís í kreppunni;  er ljós í myrkri og ætti að hafa verið til umfjöllunar miklu meira.  Og kannski eru bara fleiri verksmiðjur í smíðum...hver veit ?  Allavega eru fréttamiðlarnir alls ekki að uppfræða okkur á slíku.

Almenningi er haldið í neikvæðum hugleiðingum og svartsýnishjali.  Þetta er döpur áhersla.

Aflþynnuverksmiðja gangsett