Öskudagurinn

Nú er öskudagurinn nýliðinn.  Hin nýja íslenska hefð er að börn gangi í búningum um þéttbýli landsins og kaupi sér nammi með söng af fyrirtækjum og stofnunum.

Auðarskóli er fyrsti skólinn sem ég starfa í sem það er hefð að nemendur komi við í söngvagöngum sínum.  Í hinum skólunum forðuðust nemendur að heimsækja skólann á öskudag.  Í Auðarskóla var vel tekið á móti hópunum og myndir teknar af þeim öllum og birtar á heimasíðu skólans.  Slóð hér. 

Rikki lét ekki sitt eftir liggja og klæddi sig upp sem "nörd".  Búningurinn fór honum svo vel að það hvarflaði að okkur að hafa hann bara svona í framtíðinni. 

Rikki fékk mikið nammi og borðaði það fram á nótt án þess að fá svo mikið sem í magann.  Geri aðrir betur.

Í boði frjálshyggjunnar

Hin hægrisinnaða frjálshyggja verður okkur Íslendingum greinilega dýrkeypt.  Vonandi rís hún ekki aftur upp frá dauðum.  Vissara að grafa hana enn dýpra niður í hin svörtu myrkur.

Mestu búferlaflutningar Íslandssögunnar

Stórfjölskyldan til Tenerife

Í sumar leggur ættmóðirin Sigríður Símonardóttir upp í ferðalag til Tenerife með öllum afkomendum sínum og mökum þeirra.  Hefð hefur verið fyrir að stórfjölskyldan fari í slík ferðalög innanlands ár hvert en þetta er fyrsta slíka ferðalagið sem farið er erlendis.  Þá hefur hópurinn stækkað jafnt og þétt síðustu árin.

Svona ferðalög eru nú ekki beinlínis gefins þessa dagana, þannig að nú eru flestir að skrapa saman alla þá aura sem þeir finna svo hægt sé að komast í sólina hjá Kanaríubúunum.   Til að svo megi verða höfum við verið dugleg að gera hlutina sjálf; t.d stendur til að blanda sína eigin sólarvörn hér heima áður en lagt er af stað...slíkt sparar þessari ljósu og sólbrunalegu fjölskyldu tugi þúsunda.

Merkileg saga

Sá sem sólundar öllu sínu fé eins og þessi maður og fer svo á bætur... á hann rétt á þeim ?

Vann tvo milljarða í lottói en er kominn aftur á bætur

Skemmtilegur vefur

Rakst óvænt á þennan vef.  Hann geymir aldeilis gott myndefni.  Vel gert hjá nágrönnum okkar á Reykhólum.  http://batasmidi.is/

Seint koma sumir en koma þó

Bændur eru enn að heimta fé. Nú rétt fyrir byrjun þorra heimtust ein útigengin ær með veturgamalli gimbur og lambhrútur, en féð fannst í Austurmúla í Dunkárdal í Dalasýslu. Það var Kjartan Jónsson bóndi á Dunki sem var þar á ferð á fjórhjóli að svipast um eftir fé og fann þá lambhrútinn sem hann átti sjálfur. Kallaði hann þá til vaska smala með hunda úr Kolbeinsstaðahreppi til aðstoðar. Fundu smalarnir hrútinn og skammt frá honum útigengna á með veturgamalli gimbur en þær mæðgur eru frá Hallkelstaðahlíð. Þetta kemur fram á vef Skessuhorns.

Fréttaritari Skessuhorns hafði spurnir af því að ærin Kvika frá Hallkelsstaðahlíð, sem nú kom í leitirnar, væri svolítið forvitnileg af kind að vera og brá sér því í heimsókn þangað heim. Hitti þar í fjárhúsunum þau Sigrúnu Ólafsdóttur og Sveinbjörn Hallsson. Kvika er fædd 2002 og er því að fara á sinn áttunda vetur. Hefur hún alls gengið fjóra vetur úti. Segir Sigrún að hún hafi í tvígang verið felld út úr fjárbókhaldinu því enginn hafi reiknað með henni aftur. Kvika hefur aðeins einu sinni komið heim með ómarkað lamb úr þessum vetrarútilegum sínum.

Enn fleiri góðar fréttir

Stjórnvöld hafa gefið út fyrsta formlega leyfið til að undirbúa virkjun sjávarfalla við Ísland. Fyrirtækið Sjávarorka hefur fengið leyfi til að rannsaka þann möguleika að virkja Hvammsfjarðarröstina út af Stykkishólmi.

Hvergi við Ísland er munur á flóði og fjöru jafnmikill og við innanverðan Breiðafjörð og þar sem óteljandi eyjar þrengja mynni Hvammsfjarðar myndast hin öfluga Hvammsfjarðarröst þegar sjórinn fossar til skiptis inn og út um sundin.

Þessa orku vill Sjávarorka beisla og hefur nú fengið rannsóknarleyfi frá Orkustofnun. Að fyrirtækinu standa RARIK og aðilar í Stykkishólmi, þeir stærstu Skipavík og Stykkishólmsbær. Athuganir benda til að þarna megi vinna álíka mikla orku og gert er í Sultartangavirkjun, sem er 120 megavött.

Stjórnarformaður Sjávarorku, Steinar Friðgeirssson, segir hugmyndina þó ekki að virkja svo stórt heldur stefnt að smærri túrbínum til að byrja með. Ekki er gert ráð fyrir neinum stíflugörðum heldur er hugmyndin að hafa hverflana einfaldlega bara í sjónum með sem minnstum áhrifum á lífríkið. Næstu skref, að sögn Steinars, verði að kanna hagkvæmni verkefnisins og að leita eftir erlendum samstarfsaðilum.

Tekið af vefnum www.visir.is

Mjög góðar fréttir

Það er í raun og veru afar ánægjulegt að sjá hversu mikil aukning hefur verið á hverju ári í kornrækt á Íslandi.  Að þjóðin geti orðið sjálfri sér næg um korn er mikilvægt við núverandi aðstæður.

Byggið er samt ekki mikið notað til manneldis.  Sennilega vegna þess að við höfum lengst af vanist öðrum korntegundum.  Það væri t.d nokkuð víst að ef hér yrðu ræktaðir hafrar að meira yrði notað af þeim.  Engu að síður er byggið talið meinholt.

Hægt að fjórfalda byggræktun

Veðrið enn einu sinni

Hér í Búðardal hefur verið gott veður í allan dag.  Rok og rignin víða í kring t.d var nær aftaka veður í Saurbænum uppúr hádeginu.  Það er sláandi hversu mikill munur er á veðri á þessum 30 km.  Einnig svolítið skrýtið að það skuli í sunnan átt vera hvassara í Saurbæ og á Laugum heldur en í Búðardal...væri eðlilegra að álíta að svo væri í norðanátt.

Álagahamur fellur þegar menn gangast við ábyrgð sinni

"Góðærið var ekki ávöxtur ræktunarstarfs Íslendinga heldur ávextir tíndir úr annarra garði. Hrunið er afleiðing heimsku. Nú eru álögin fallin og okkar hlutverk er að horfast í augu við ástæður og afleiðingar skaðans og læra af. Við eigum ekkert og áttum ekkert. Allt er að láni frá Guði, skapara alls sem er. Í okkar ábyrgð felst að fara vel með. Sú ábyrgð varðar það sem er í samhengi okkar en hún nær þó víðar. Við eigum að fara vel með hvert annað, með stofnanir samfélagsins, náttúruna og allt lífríkið. Álagahamur fellur þegar menn gangast við ábyrgð sinni."

Tekið af vefnum www.tru.is   Öll greinin hér: http://tru.is/pistlar/2010/01/ur-alogum