Tyrkland

Í Tyrklandi búa rúmlega 73 milljónir manna og er fólkfjölgun um 1,2 % á ári.  Langstærsta borgin er Istanbul með um 15.000.000 íbúa.  Næst kemur höfuðborgin Ankara með um 4500.000 íbúa. Tyrkir verða nokkuð eldri en ég bjóst við en meðalaldur kvenna er 74 ár og 69 ár hjá körlum.

Tyrkir eru ekki beint trúaðir þótt 98 % þjóðarinnar játi Islamska trú.  Um 50 % Tyrkja segjast ekki rækja trú sína eða rækja hana lítið.  Engu að síður byggja þeir moskur í öllum þorpum og bæjum.  Í landinu eru alls rúmlega 72.000 moskur; meira en í nokkru öður landi.

Landið er stórt eða 814.570 ferkílómetra.  Þótt landið sé hálent er það afar gróðursælt og frjósamt.  Ég bjóst við að sjá eyðumerkur og nakin fjöll en sá þess í stað gróðurvaxin fjöll og stöðuvötn.  Af vatni er miklu meira en nóg og þeir nota það óspart til að þvo bíla og stéttir. 

Læsi er almennt og vaxandi og er 94 % karlmanna læsir og 80 % kvenna.  Átta ára skólaskylda er í landinu fyrir bæði kyn og eftir það taka við framhaldskólar og háskólar.  Leikskólar þekkjast hinsvegar varla og er aðeins um 2 % barna sem fara á slíka skóla.  

Stjórnarskráin og lagabálkar taka mið af Evrópskum lögum.  Menning þeirra er mjög blönduð af vestrænni og einhverskonar austrænni menningu.  Tyrkir eru ekki af arabískum uppruna og finnst vera móðgun ef þeir er bendlaðir við það.  Tyrkir tóku upp Evrópskt letur 1923.

Gamla góða Frón

Þá er fjölskyldan komin aftur til landsins eftir viðburðarríka og skemmtilega dvöl í Tyrklandi.  Vorum ekki komin fyrr en kl. 8.00 í morgun...úff hvað þetta var langt og þreytandi ferðalag. 

Aldrei þessu vant þá varð enginn veikur í ferðinni (fyrir utan hefðbundin ofnæmi) og það þrátt fyrir ansi mikinn hita á köflum.  Reyndar upplifðum við að það er ekki sjálfgefið að allir komi heilir heim.  Pabbinn í einni fjölskyldunni á hótelinu okkar dó úti (hjartaáfall) ytra.

En ferðin var, þrátt fyrir ofangreint,  í heild góð og allir ánægðir.  Teknar hafa verið mörg hundruð myndir á margar vélar og minniskort.  Einnig klukkutímar á dvd.  Svo það verður einhver bið á að myndir fari að birtast á netinu.  Skelli inn fróðleiksmolum um Tyrkland og Marmaris næstu daga.  Fer að vinna í myndunum þegar hann fer að rigna.

 

Marmaris á morgun

Þá er komið að því.  Fjölskyldan á Víðivöllum 14 heldur af stað í fyrramálið til Marmaris í Tyrklandi. Ferðalagið tekur um 11 tíma frá Selfossi.  Við ferðumst á vegum Úrval Útsýnar og verðum á Forum Hotel - Residence, sem okkur virðist vera ágætist íbúðarhótel.  Slóðin á hótelið hér.   Nokkurn ugg hefur setta að okkur vegna hitabylgju sem gengið hefur yfir Tyrkland og víðar.  En hún er nú í rénum og spáin gerir ráð fyrir max 31 gráðu alla næstu viku.

Undirbúningur hefur tekið allnokkurn tíma enda að mörgu að hyggja þegar 6 manna fjölskylda fer af stað.  Hver og einn hefur sínar þarfir og væntingar.  En nú er spennan að ná hámarki, búið að kaupa gríðarlegt magn af sólarvörn á ljóslitaða fjölsyldumeðlimi og síðustu flíkurnar að hverfa ofan í ferðatöskurnar.

Skil tölvuna eftir og reikna ekki með að blogga ytra. Sjáumst 13. júlí aftur.

Landið fýkur burt

Í norðan strekkingnum í dag sést vel hvernig moldin af sunnanverðu hálendinu fýkur burt.  Brúnleitt mystur er í loftinu; dekkst nyrst og lýsist svo upp á leiðinni  yfir Suðurlandsundirlendið til sjávar.  Þá sést líka hvernig fýkur af Ingólfsfjallinu; þar skefur ofan af því ljósbrún moldin.

Eflaust er þetta ekki neitt smá magn, sem fýkur svona á haf út.  Sorglegt að horfa uppá þetta, því í raun fýkur landið burt og skilur eftir sig moldarlaus svæði og algjörlega gróðursnauð.

Sumarfrí

Jæja þá styttist í sumarfríið.  Hætti snemma í dag og ætla ekki að vera með fast viðveru næstu vikurnar.  Á samt nokkur verkefni til dunda mér við á rigningadögum.  Búinn að taka ákvörðun um að smíða sólpall í fríinu og hef þegar teiknað hann upp.  Vonandi verður þetta eitthvað meira en teikning þegar sumarið er úti.

Nú styttist óðum í utanlandsferðina góðu með fjölskylduna til Marmaris í Tyrklandi.  Ein vika nákvæmlega þar til farið verður.

Mikið gaman

Fórum fjögur úr fjölskyldunni á leikinn.  Mátti engu muna að við yrðum að sætta okkur við sæti úti í horni svo mikil var ásóknin á leikinn.

Stemmingin var frábær og boltinn sem stelpurnar leika mjög fínn.  Serbarnir voru ekki að spila illa og á köflum spiluðu þeir ágætlega saman en íslenska liðið var einfaldlega betra.

Fimm marka sigur Íslands á Serbum

Að nota prjóna

Fékk þessa yndislegu mynd frá Huldu frænku minni, sem náði henni af mér í Leeds á dögunum.  Mér tókst sem sagt að borða með prjónum á þessum kínverska matsölustað.

Fréttir RÚV af bruna Bílsins

Ágætar myndir, skýringar og viðtal við slökkviliðið er að finna í kvöldfréttatíma RÚV nú í kvöld.  Slóðin á fréttatímann er hér. http://dagskra.ruv.is/streaming/sjonvarpid/?file=4338337  

Myndir af vettvangi

Nú hef ég sett inn nokkrar myndir af vettvangi daginn eftir brunan í Bílnum.  Sést svo sem ekki mikið en lögreglan segir verkstæðið í raun gjörónýtt.  Sjá hér.

Verkstæðið hans Kela brann

"Eldur kviknaði í verkstæði í Gagnheiði á Selfossi á níunda tímanum í kvöld. Slökkvilið er nú á vettvangi og var að mestu búið að ráða niðurlögum eldsins um klukkan níu. Samkvæmt lögreglu eru gaskútar í húsinu og var óttast að þeir myndu springa. " (Af sudurland.is )

Fór á vettvang og sá að verkstæðið er illa leikið... þó ekki alónýtt.  Skelfilegt áfall fyrir Kela og karlana í Bílnum.