Dalamenn eignast þingmann

Ásmundur Einar Daðason, bóndi og háskólanemi á Lambeyrum í Dalasýslu, er fæddur 1982, sonur Daða Einarssonar bónda á Lambeyrum og Önnu Sigríðar Guðmundsdóttur frá Ljárskógum í Dölum. Ásmundur varð búfræðingur frá Landbúnaðarháskólanum á Hvanneyri 2002 og lýkur B.Sc. prófi í almennum Búvísindum frá Landbúnaðarháskóla Íslands í vor. Ásmundur hefur stundað búskapinn samhliða námi undanfarin ár og unnið að þróunarverkefni á örmerkjum í sauðfé. Hann var formaður Stúdentaráðs LbhÍ 2003-2004, formaður Félags sauðfjárbænda í Dalasýslu frá 2005 og formaður svæðisfélags VG í Dölum 2005-2007. Hann var varasveitarstjórnarfulltrúi fyrir VG í Dalabyggð frá 2006. Ásmundur er annar tveggja kosningastjóra VG í NV-kjördæmi í vor. Unnusta Ásmundar er Sunna Birna Helgadóttir háskólanemi við LbhÍ. Þau eiga eina dóttur.

Borgarahreyfingin - góð viðbót á þing

Ég er einn þeirra sem er hress með að sjá Borgarahreyfinguna koma fólki inn á þing.  Ekki varð ég síður ánægður undir morgun þegar ljóst varð  að efsti maður hreyfingarinnar í mínu kjördæmi komst á þing.

Margrét Tryggvadóttir verður frábær fulltrúi Suðurkjördæmis og fólksins í landinu.

Geir H. Haarde ...ekki pappírsins virði ?

Í ræðu sem Geir H. Haarde flutti þann áttunda desember 2006 á Alþingi sagði hann:

„Við höfum ekki séð nein merki þess í dag að reynt sé með óeðlilegum hætti að hafa áhrif á stjórnmálastarfsemina í landinu af hálfu fjársterkra fyrirtækja eða fjársterkra einstaklinga en við viljum reisa skorður við þeim möguleika áður en slíkt gerði hugsanlega vart við sig og við viljum jafnframt gera flokkunum mögulegt að starfa með öflugum hætti með því að veita þeim eðlilegan stuðning af opinberu fé. Við teljum það nauðsynlegt til þess að flokkarnir geti sinnt því grundvallarlýðræðishlutverki sínu og því sem þeim er ætlað í stjórnskipan landsins. Við teljum nauðsynlegt að verja stjórnmálalífið fyrir þeirri hættu að gerðar verði tilraunir til þess að hafa áhrif á úrslit einstakra mála með óeðlilegum hætti."

Aðeins þremur vikum síðar tók sami maður við 30 milljón króna styrk frá FL Group fyrir hönd Sjálfstæðisflokksins.

Sorgarviðbrögð sem ber að virða

Fyrir nokkrum árum hefðu margir lagt við eyrun og jafnvel fundið hjá sér áhuga á að trúa einhverju sem Frjálshyggjufélagið sendi frá sér.  Sá tími er liðinn.  Eftir standa þó eins og saltstólpar einhver hópur fólks, sem áttar sig ekki á raunveruleikanum.   Frjálshyggjan var blindgata, sem framdi sjálfsmorð.

 Auðvitað þyrfti fólkið sem trúði á frjálshyggjuna á hjálp að halda.  Hér er um dæmigerð sorgarviðbrögð að ræða sem engu að síður  ber að virða.

Fagna andláti nýfrjálshyggjunnar

Ný stjórnskipan ?

Svaf ég á verðinum ?  Sami forsetinn í áratug, sömu flokkarnir við stjórn um áratug.  Davíð við stjórnvöldin í einn og hálfan áratug.  Nei það skipti víst engu máli þótt ég hafi aldrei kosið þann mann né hans flokk.  Ég fékk engu ráðið.

Nú vona allir að nýjar kosningar breyti einhverju.  Og það er reyndar alveg nauðsynlegt að hafa von. En skyldi nýir ráðamenn breyta stjórnsýslunni ?  Skyldi niðurstaða rannsóknar á klúðrinu leiða í sér miklar breytingar ?  Alþjóðlegur dómur um kvótakerfið hefur engu breytt.  Ráðleggingar hagfræðinga árum saman hafa engu breytt.  Fákeppni í matvöru, flugi, lyfjasölu, byggingarvöru, olíusölu, tryggingasölu...án mikillar samkeppni er látin líðast án átölu. 

Skyldi þá ný stjórnskipan taka á þessu öllu og gera þetta eins og hjá siðuðum þjóðum ....trúlegt ??....nei.  Held barasta ekki.

 

Þegar eldur er laus

Efnahagsbálið á Íslandi logar skærar en flest önnur slík í Evrópu.  Nánast því flestir sem tjá sig um þennan bruna telja hann að stórum hluta  kveiktan af stjórnmálamönnum, sem haldið hafi um stjórnartauminn síðusta áratuginn eða svo.

Nú stjórna slökkvistarfinu sömu aðilar og kveiktu bálið.   Það virkar fáránlega en...

Þegar ég var lítill hafði ég gaman af því að kveikja í sinu heima í sveitinni.  Það fór eftir ákveðnum reglum sem pabbi stýrði.  Einu sinni freistaðist ég til að kveikja sinu í lítilli þúfu án vitundar pabba. Ég réði ekkert við eldinn og hann fór þegar í næstu þúfur og breiddist hratt út.  Ég hamaðist við að slökkva enda vissi ég uppá mig sökina.  Að lokum stöðvaðist sinubrunin; aðallega vegna þess að í mýri og skurðir stóðu að lokum í vegi fyrir honum.

Við þessar aðstæður hefði verið fáranlegt að reyna ekki að slökkva.   Því hef ég fullan skilning á því að sökkvimenn þjóðarinnar fari fram í tilraunum í að koma böndum á efnahagsbálið. 

Það verður síðan að koma í ljós hvort einhver treystir þeim til að fara með eldfæri aftur.

 

 

Til hamingju Flateyringar !

Í mínum huga er mikilvægt að störf hjá ríkinu, sem jafnhagkvæmt er að vinna á landsbyggðinni,  dreifist um allt landið en séu ekki öll á höfuðborgarsvæðinu eða í stærstu þéttbýlisstöðum landshlutanna.  

Eins og þetta tilvik sannar þá skiptir íbúafjöldi  staðanna  ekki öllu máli þegar tekið er við opinberum verkefnum frá Reykjavík, heldur skiptir umfang og eðli verkefnanna máli þegar og staðsetning er síðan valin .  Þannig er ljóst að mjög margir staðir á landinu koma til greina með ýmissleg verkefni.

Flateyringar koma örugglega til með að sinna þessu verkefni vel.  Til hamingju Flateyringar !

Innheimtustofnun hefur starfsemi á Flateyri

Sarah Palin...

Sarah Palin, varaforsetaefni Rebúblikana í Bandaríkjunum, hefur m.a eftirfarandi skoðanir:  Hún vill láta kenna sköpunarsöguna í grunnskólum sem vísindi til jafns við þróunarkenninguna.  Hún vill banna fóstureyðingar alfarið.  Þá  líka við  eftir nauðgun og sifjaspell.  Hún er á móti hjónabandi og sambúð  samkynhneigðra og því að þeir fái að ættleiða börn.  Hún vill láta bora eftir olíu í þjóðgörðum Alaska.  Hún er ævifélagi í samtökum byssueigenda og því á móti allri takmörkun á byssueign. Hún er fylgjandi dauðarefsingum. 

Nei...hún er ekki 150 ára gömul eins og halda mætti af upptalningunni...hún er 44 ára !

Ríkið á ekki að lækka álögur á bensín

Ég held að Ríkið eigi ekki að fara út í að lækka álögur á bensínið.  Miklu frekar að leggja fé í að styðja og styrkja leiðir til að nota nýja orkugjafa.   Olían er bráðum búin í heiminum og mikilvægt er fyrir jörðina okkar að finna umhverfisvænni orkugjafa.

Svo ekki lækka álögur á bensínið...það leysir engan vanda til lengri tíma.

„Gagnslaus fundur“

Verktakar hefna sín....ef þeim er mótmælt.

Fyrir nokkrum vikum bloggaði ég um "spennitreyju verktakanna" þar sem ég fullyrti að sveitarfélögin væru að missa forystu sína í skipulagsmálum og treystu æ meira á frumkvæði stórra verktaka.  Afleiðingin væri oftar en ekki lítt ígrunduð skipulagsslys með litlausum hverfum.

Nú er umræða um yfirgefin og niðurnýdd hús í gamla miðbænum í Reykjavík.  Verktakar kaupa upp hús með væntingar um að byggja ný og stærri hús á einstökum lóðum eða nokkrum lóðum saman.  Síðan kemur í ljós að leyfi fást ekki til slíkra skipulagsbreytinga og verktakinn situr uppi með eignir sem hann gæti hugsanlega selt ef hann gerði slíkt strax.   Það gerir hann hinsvegar ekki vegna gróðavonar um að leyfi fáist síðar og reynir þá í kjölfarið að skapa "ástand" í kringum yfirgefin hús og svæði til þess að þrýsta á skipulagsyfirvöld.

Fyrir barðinu á þessari græðgi verktakanna verða svo íbúar í nágrenninu miklu fremur en skipulagsyfirvöld.  Íbúarnir horfa upp á hústökufólk, íkveikjur og draslaragang af öllu tagi.  Hverfið þeirra verður verðminna.  Því er best að forða sér úr hverfinu sem fyrst, því verktakarnir þeir hefna sín...ef þeim er mótmælt.