Geir H. Haarde ...ekki pappírsins virði ?

Í ræðu sem Geir H. Haarde flutti þann áttunda desember 2006 á Alþingi sagði hann:

„Við höfum ekki séð nein merki þess í dag að reynt sé með óeðlilegum hætti að hafa áhrif á stjórnmálastarfsemina í landinu af hálfu fjársterkra fyrirtækja eða fjársterkra einstaklinga en við viljum reisa skorður við þeim möguleika áður en slíkt gerði hugsanlega vart við sig og við viljum jafnframt gera flokkunum mögulegt að starfa með öflugum hætti með því að veita þeim eðlilegan stuðning af opinberu fé. Við teljum það nauðsynlegt til þess að flokkarnir geti sinnt því grundvallarlýðræðishlutverki sínu og því sem þeim er ætlað í stjórnskipan landsins. Við teljum nauðsynlegt að verja stjórnmálalífið fyrir þeirri hættu að gerðar verði tilraunir til þess að hafa áhrif á úrslit einstakra mála með óeðlilegum hætti."

Aðeins þremur vikum síðar tók sami maður við 30 milljón króna styrk frá FL Group fyrir hönd Sjálfstæðisflokksins.

Afhjúpunin mun halda áfram

Það er nokkuð ljóst að ekki hefði komist upp um styrkina tvo til Sjálfstæðisflokksins, nema af því að fyrirtækin sem voru svona rausnaleg fóru á hausinn.  Óvænt örlög ollu því að ekki var lengur hægt að fela slóðina.  Hvort þetta er einstakt tilvik vegna skulda sem sjálfstæðismenn freistuðust til að gera upp eða hvort hér var um viðtekna venju að ræða...skal ósagt látið.  Lyktar af siðleysi, siðferðisbresti og valdabrölti.  Mjög slæmt fyrir alla þá  fjölmörgu sem hafa trúað því að flokkurinn sé vel rekinn, skipulagður og heiðarlegur.

Það er að fjúka í flest skjól spillinga og græðgi.  Afhjúpunin mun halda áfram næstu árin...örlagavaldurinn var hrunið.

Skilað til lögaðila

Norðvesturkjördæmi

Ég horfði á beinar umræður í sjónvarpinu í gærkveldi milli frambjóðenda í Norðvesturkjördæmi.  Það verður nú að segjast að það er miklu skemmtilegra að hafa nýu framboðin með.  Bæði Borgarahreyfingin og Lýðræðishreyfingin koma með ný og skemmtileg sjónarhorn inn í umræðuna.  Annars einkenndist þessi hópur af nýju fólki í heildi sinni.

Hinn nýji forystumaður sjálfstæðismanna Ásbjörn Óttarsson hljómaði ekki vel.  Röddin og talandinn var ekki sjónvarpsvænn.  Þetta mun að sjálfsögðu smálagast.  Þetta sást vel í samanburði við Svein Braga frá Framsókn.  Hann er líka nýr, en rödd hans, framkoma og talandi var mjög þægileg.  Jón Pétur Líndal, minn gamli skólafélagi, stóð sig vel.  Rólegur og skipulagður eins og hans er vandi. 

Könnunin á fylgi flokkanna kom ekki á óvart.  Ég á þó frekar von á því að sjálfsæðisflokkurinn tapi öðrum manni og Frjálslyndir komi kjördæmakosnum manni að.

 

Pálmasunnudagur

Fjölskyldan mætir í tvær veislur í dag.  Fyrst er það súpa fyrir stórfjölskylduna  hjá Helgu systur kl. 12.30 og svo fermingaveisla hjá frænku Guggu kl. 15.30.

Svona eiga Pálmasunnudagar að vera.

Megi mál ykkar leysast á farsælan hátt

Ég óska þess að mál Guðnýjar og fleiri í hennar sporum fái lausn hið fyrsta.  Megi þjóðin bera dug til að forgangsraða betur svo ekki gleymist að gera ráð fyrir dýrmætum mannverum.  Leggjumst á eitt svo að þannig megi verða.

Innilegar kveðjur frá mér til Guðnýjar, Steinunnar og fjölskyldu. 

 Lói

Lokað á langveika stúlku

Af hverju horfa óánægðir Sjálfstæðismenn ekki til Framsóknar ?

Ég skil ekki hversvegna Framsóknarflokkurinn fær ekki meira fylgi ef fólk leitar frá Sjálfstæðisflokknum.  Þannig hefur það oftast verið.  Það virkar ekki rökrétt að hætta við að kjósa hægri flokk og fara að kjósa vinstri flokk.  Næsti viðkomustaður ætti að vera annar hægri flokkur eða miðjuflokkur eins og Framsókn.  Hversvegna horfa óánægðir Sjálfstæðismenn ekki til Framsóknarflokksins ??

Samfylking áfram stærst

Fleiri íbúar

Nú hefur íbúum á Viðivöllum 14 fjölgað um tvo.  Til heimilis eru nú tvær kanínur og eru þær aðallega til að hressa lund Rikka.  Þær eru nú ekki frekar til plássins blessaðar enda ekki mikið eftir af því á þessu heimili.  Vonandi verður hægt að hafa þær úti við grasslátt í sumar.  Tíkinni er hinsvegar ekkert um þessa kafloðnu íbúa gefið og lætur þá stöðugt finna hver fer með gæludýravaldið á þessu heimili.

Brrrrr

Ég hélt í einfeldni minni að það væri að vora aðeins.  Nú er bara frost og skafrenningur með snjókomu á degi hverjum. Reiðhjólin sem bjartsýnir Selfyssingar tóku út fyrir nokkrum dögum eru að snjóa í kaf.

Og bylur fyrir norðan og vestan.

Huggulegast væri að fá sér kaffi að hætti Íra....

 

Álver

Nú er skoðanakönnun á síðunni minni búinn að vera nógu lengi.  Þar var spurt um vilja fólks til að reisa ný álver.  Rúmlega hundrað höfðu svarað og kom niðurstaðan nokkuð á óvart. 

Það að rúmlega 40 % vilja alls ekki fleiri álver í bili kemur kannski ekki mjög á óvart.  Hinsvegar kemur mér á óvart að næst flestir skyldu ekki velja þann kostinn að þeir vildu bara eitt álver til viðbótar, þ.e annað hvort á Bakka eða í Helguvík.  Næst flestir eða tæplega 30 % völdu að þeir vildu sjá þrjú ný álver;  á Bakka, í Helguvík og í Þorlákshöfn.  Þá kemur líka í ljós að mun fleiri vilja bara álver á Bakka heldur en í Helguvík...þótt það síðarnefnda sé komið áleiðis.

Kardemommubærinn

Mamma og amma buðu yngstu barnabörnunum sínum þremur ásamt foreldrum á Kardemommubæinn í Þjóðleikhúsinu.  Ég hafði aldrei séð sýninguna áður, en hlustað 1000 sinnum á hana í gegnum æsku mína og æsku barna minna.  Því kom sumt nokkuð á óvart þegar maður sá þetta svona beint á sviðinu; t.d það að umhverfi bæjarins var greinilega suðrænt, þ.e þarna var mikið sólskin og mikið af pálmatrjám.

Þegar maður horfði yfir salinn sá maður að fullorðna fólkið sat með sælubros á vör af áhuga og ánægju.  Yngri kynslóðin var ekki jafn heilluð...þó held ég að allir hafi skemmt sér vel.