Drekkum TE .....en ekki kaffi

Te fróðleikur ...

Telaufin eru þurrkuð og gerjuð lauf sígræna runnans camellia sinensis eða afbrigðis hans sem kallast camellia assamica. Terunninn getur náð töluverðri hæð, en er klipptur niður til að auðvelda tínslu og fjölga blaðknúppum.
Einungis blöðin eru notuð við uppskeru, stilkur með toppum og tveimur blöðum. Því yngri og fíngerðari sem blöðin eru því betra verður teið. Úr neðri blöðunum er unnið grófara te og er það þá oft malað og notað í grisjute.

Eftir tínslu eru laufin látin þorna í sólinni í 16 – 20 tíma, þá marin í þar til gerðum vélum og látin gerjast í tvo til þrjá tíma í rakamettuðu umhverfi. Eftir það er teið þurrkað í upphituðu lofti í u.þ.b. 20 mín. Ef búa á til grænt te er gufa látin leika um laufin áður en þau eru marin og þau ekki látin gerjast. Einnig er til svokallað Oolong te sem er hálfgerjað.

Helsta teræktarland heims er Indland, en Kína er ekki langt á eftir. Sri Lanka (Ceylon) er svo í þriðja sæti. Einnig er talsvert framleitt af tei í Afríku og Indónesíu.

Reynsla mín...

Ég hætti fyrir um það bil einu og hálfu ári að dekka kaffi frá morgni til kvölds. Þess í stað fór ég að drekka einstaka tebolla og eftir nokkrar vikur fór svo að ég sleppti alveg kaffi.  Ekki er hægt að segja annað en að heilsan hafi batnað til muna.  Streita minnkaði, óþol hvarf, vöðvabólga og slen minnkaði.  Hugsa sér bara við það að hætta að drekka kaffi.´

Ég drekk margskonar te; svart te, grænt te og jurtate ýmiskonar.  Ég er hinsvegar ekki nægilega flottur á sjálfri tedrykkjunni. Næstum eingöngu pokate og sumt á tilboðsverðum úr Bónus. Ætti eiginlega að fara til þess að kaupa almennilegt te, tesíur og tebollasett og hefja sjálfa tedrykkjuna til vegs og virðingar.

Athugasemdir

[Ester Júlía, 18.4.2006 kl. 22:56]

Sammála með tedrykkjuna. Ég drekk reyndar kaffi líka en tek "tetúra" ..td. þessa dagana elska ég detox te ..drekk 3-4 bolla af dag og nýt þess vel..
bestu kveðjur
Ester

[Björn (IP-tala skráð) 28.4.2006 kl. 07:33]

Það er ruglandi að kalla allt mögulegt te sem ekki er te.
Jurtaseyði er ekki te.
Ég hef ekki drukkið kaffi og bið oft um te á veitingastöðum og fæ þá oft bakka með ýmsu jurtaseyði.
Te er algengasti drykkur í heiminum og mikið notað í austurlöndum.
Þegar flutningar hófust frá austurlöndum var erfitt að flytja það og vildi það blotna, hitna og skemmast eins og hey og verða ónýtt.
Var þá tekið upp það ráð að reykja það og þurka og blanda síðan í það alls kyns ilmefnum.
Þetta er ekki te að mínu mati og á fátt sameiginlegt með góðu tei.
Grænt te er te.
Allt hitt eru ilmvötn og/eða jurtaseyði.
Það eru til ýmsar tegundir af grænu tei.
Sannur tedrykkjumaður gerir greinarmun á mismunandi (grænu) tei.