Læknirinn sagði...

Ég hef undanfarin dægur fundið fyrir einkennilegum seiðingi í hægra gagnauganu.  Líkt og æðarnar væru að slást sundur og saman og fylgdi dofi út á kinn og afturfyrir eyru.  Heldur hefur þetta verið að ágerast og í dag fann ég fyrir léttum hausverk og helludoða á mestöllum hægri helmingi höfuðsins.

 Það var því ekki seinna vænna en að leita lækis áður en ég fengi heilablóðfall eða því nú verra.  Læknirinn skoðaði mig ekki mikið.  Mældi blóðþrýstingi, og potaði í mig á nokkrum stöðum í baki, hálsi og höfði.  Svo sagði hann að ég væri með álagsverk, trúlega vegna andlegrar áreynslu.  Ef ég næði að slaka meira á hyrfi verkurinn. 

Hann bauðst einnig til að lækna þetta í einni svipan með nálastungu, sem ég þáði.    Eftir að heim kom hef ég leitað logandi ljósi að leiðum til að slaka á.  Og þar er ég núna í ferlinu.

 

 

Athugasemdir

[Jón Baldvin Hannesson, 16.11.2006 kl. 21:48]

Heyrðu félagi, farðu vel með þig. Þú ert í stressandi starfi og það er auðvelt að láta verkefnin hakka í sig andlegt heilbrigði. Þín ábyrgð liggur auðvitað fyrst hjá sjálfum þér, enda geturðu ekki þjónustað aðra nema halda heilsu. Góðar kveðjur úr fannfergi og kulda norðursins.