En gaman

Það eru aldeilis skemmtilegar fréttir sem maður les af Reykhólavefnum þessa dagana. Sjá: http://reykholar.is/frettir/Fjolmenni_vid_tokur_a_franskri_mynd_i_Reykholasveit/ 

 

 

Góðir gestir

Í Búðardal er nú fjöldi nýrra og skemmtilegra gesta. Finnast þeir í tugum ef ekki hundruðum. Hér er á ferðinni blessuð rjúpan, sem nú á í hamskiptum um þessar mundir.

Afskaplega vingjarnlegt er kurrið sem heyrist inn um gluggann minn jafnt í vinnu sem heima. Helst að sjá að kettir amist við þessum fallegu og vinalegu gestum.

Komnar á netið

Jæja ég er loksins búinn að koma 77 myndum (eitt myndaalbúm) sem ég skannaði á Flickr myndavefinn minn. Er núna að merkja þær og skrifa minningarbrot um þær allar. Svo á ég eftir að flokka þær þar niður í möppur. Gömlu myndirnar sem ég á fyrir á Flickr eru allar merktar og flokkaðar en ég á eftir að skrifa minnigarbrot um þær flestar. Sumar þeirra eru reyndar svo gamlar að þær eru af ömmu minni ungri...þannig að ég þarf örugglega hjálp við slíkar minningar.

Svo ég vinn hörðum höndum við að skrá minningar í myndum og máli.   Mikil vinna en mikið mikið gaman.

Bein slóð á nýjustu (gömlu) myndirnar er:http://www.flickr.com/photos/guggaogloi/

PS.
Myndirnar sem þið sjáið eru ekki alveg sömu myndirnar og komu úr myndavélinni á sínum tíma.  Ég tek rauð augu í burtu, kroppa þær til, hita litina, breyti lýsingu og fl.   Laga lika stundum rispur og bletti. 

Afmælisveisla

Þessi einstaka mynd er tekin á 6 ára afmæli Birnu Bjartar 1995.  Afmælisveislan var á Laugarfelli.  Ég man nokkuð vel eftir myndatökunni, því við höfðum talsvert fyrir því að fá öll börnin til að stilla sér upp í röð.  Ef grant er skoðað kemur í ljós að allir nema einn gerir ekkert hlé á því að nærast; allir annaðhvort að soga Frissa fríska upp úr fernu eða háma í sig pulsu.

Annað sem tíðkaðist í afmælum á þessum tíma sést á myndinni, en það er poppkorn (nú eru allir í snakkinu).  Allir í afmælinu fengu poppkornspoka þegar þeir voru búnir með pulsuna en ljóst að Stulla fannst tryggara að sækja sér hann strax og heldur hann fast um hann á myndinni.

Tvísmellið á myndina til að sjá hanna í fullri stærð. 

PS: Auðvitað á að standa Ívar en ekki Ívan...afsakið það. 

Júdomaðurinn

Þessi mynd er tekin sumarið 1993, þannig að Stulli er sennilega rúmlega hálfsárs gamall.  Hér situr hann úti í náttúrinni í sinni fyrstu fjallaferð - en myndin er tekin í Vaðalfjöllum stuttu áður en fjölskyldan flutti frá Reykhólum að Laugum.

Það má sjá á þessari mynd að Stulli er strax á fyrsta ári júdólega vaxinn.

Að hestbaki

Þessi mynd er tekin sumarið 1994 í fjölskylduferðalagi en þá datt okkur Guggu það snjallræði í hug að fara með kornung börnin í tjaldferðalag.  Það gekk bara vel. 

Jæja ...en á þessari mynd brosir Birna sínu breiðasta á hestbaki við mömmu sinni sem tekur myndina.  Enginn virðist taka eftir því að eins og hálfsárs patti standi að hestbaki og horfir löngunaraugum á freistandi tagl.  

Fylgir því  hræðilega óþægileg tilfinning að horfa á myndina.

Fyrirsætur á fjalli

Ég er búinn að opna enn eitt myndaalbúmið og byrjaður að skanna það. Nú er það tímabilið 1993 - 1994. Skemmtilegt tímabil þegar Birna, Stulli og Keli voru öll lítil og fjölskyldan bjó á Laugarfelli.

En í albúminu er líka þessi mynd, sem er tekinn á toppi Hafratinds um miðjan september 1993. Þá gengu ég, pabbi, Gulli og Sólveig á fjallið í blíðskaparveðri.

Herrarnir á myndinni eru ótrúlega líkir þeim herrum sem maður sér í dag í Dressmann auglýsingum í sjónvarpinu. Eins og fyrirsætur á fjalli.

(Til að stækka myndina smellið þá á hana - og svo aftur og þá kemur hún í fullri stærð. )

Evran er hættuleg íslensku samfélagi

Til harðra átaka kom við Seðlabankann í gær þegar evran gerði fyrirvaralausa og fólskulega innrás í íslenskt efnahagslíf. Litlu munaði að illa færi, en snarræði starfsfólks bankans varð landinu til bjargar.

„Við urðum vör við það um miðjan dag að evrur voru farnar að flæða um miðborgina og valda umtalsverðu tjóni. Þær voru mjög grimmar, réðust beint að grunnstoðum efnahagslífins og byrjuðu að grafa undan þeim,“ sagði Már Guðmundsson seðlabankastjóri, sveittur og tættur eftir átökin, og sýndi blaðamanni bílakjallara Seðlabankans sem er illa farinn eftir árásina.

„Það er ekkert grín að fást við þessa óværu,“ bætti hann við. „Þetta er skæð plága sem eirir engu. Allir vita hvernig hún hefur leikið efnahag nokkurra ríkja í Suður-Evrópu síðustu mánuði. Við vissum af henni þar, en við áttum ekki von á að hún hefði dreift sér hingað norður eftir svona hratt.“

Már segir húsvörðinn í bankanum hafa gripið til snjallræðis sem ruglaði evrurnar í ríminu. „Hann benti þeim á landbúnaðarráðuneytið og sagði þeim að reyna bara að eiga við Jón Bjarnason. Við þetta lögðust þær í hláturskast og lágu nógu lengi til þess að við gátum komið á þær gjaldeyrishöftum. Sem betur fer áttum við svolítið af þeim á lager, en þessi hræðilega árás staðfestir í mínum huga nauðsyn þess að við komum okkur upp enn víðtækari höftum. Það er ekki víst að við verðum svona heppin næst.“

Líklegt þykir að evrurnar hafi borist til landsins með skemmtiferðaskipi sem lagðist að bryggju við Reykjavík í gærmorgun.

AF VEF EYJUNNAR

Næturfrost ?

Jæja þá er líklega komið að því. Óttinn stærstur að verða að veruleika. Sennilega er næturfrost framundan með tilheyrandi skemmdum; kartöflugrösin falla og berin eyðileggjast. Endlok alls sem heitir sumar er þegar maður svo tekur síðustu kartöflunar upp úr garðinum. Eftir það er óhætt að fara að huga að jólagjöfum.

Og fast þau sóttu berin og sækja enn

Fjölskyldan fór í dag í berjaferð. Farið var í Barmahlíðina þar sem fundust hin dámsamlegustu ber. Ekki var nú nein veðurblíða; norðan belgingur, kuldi, skúrir og hálf "klikkað" að skella sér í berjaferð. Veðrið varð síðan, þegar á daginn leið, ekki næstum eins blautt og útlit var fyrir. Og svo sáum við, okkur til hughreystingar, fullt af álíka "vitleysingum" hingað og þangað í berjamó í veðrinu. Fylgja hér tvær "kaldar" myndir af berjagörpunum.