Skólaslit

Á morgun verða skólaslit í Vallaskóla.  Þetta er stór dagur fyrir suma og kannski líka mig.  Þetta eru 10 slitin sem ég stjórna og í allt hef ég kvatt og útskrifað um 600 nemendur.  Ansi gott held ég bara.  Það leiðinlegasta við skólaslit er samt að kveðja kennara sem annaðhvort fara úr skólanum eftir mörg ár eða eru að láta af störfum eftir áratuga starf. 

Svo er bara að sjá til hvort ég tel að skynsamlegt sé að halda áfram sem skólastjóri.  Þetta er nú ekki auðveldasta starf í heiminum.

Fyrirmyndir

Það er ekki alltaf sem við fullorðnu erum góðar fyrirmyndir.   Þar má t.d nefna notkun reiðhjólahjálma og klæðaburð eftir veðri.   Við gerum mikið úr því að börn noti hjálma en það virðist samt sem áður vera orðin einhverskonar viðtekin venja að þegar börnin eru orðin um 10 ára gömul þurfi þau ekki að nota hjálma.  Við fullorðan fólkið notum nærri þvi aldrei hjálma.  Maður tekur beinlínis eftir því ef einhver fullorðinn hjólreiðarmaður er með hjálm á höfðinu.  Eina ástæða þess að börn nota ekki hjálma til 15 ára aldurs eins og bundð er í lög er að við fullorðna fólkið leyfum þeim að vera hjálmalaus.

Nú til dags nota  Íslendingar bíla eins og skjólflíkur.  Þeir fara ekki í hlýjan fatnað ef það á að skjótast eitthvað að vetralagi heldur flýta sér inn í upphitaðan bíl.   Þetta gengur náttúrulega yfirleitt upp eins og það að sleppa því að vera með hjólreiðahjálm.  En þegar einhver dettur eða ef bifreið drepur á sér í slæmu veðri er voðinn vís.   Áhætta sem við Íslendingar tökum gjarnan daglega.

Það snjóar yfir vorið

Það er ennþá úlpuveður um allt land.  Fyrir norðan skafa menn rúður og spóla í snjó á sumardekkjunum sínum.   Í kortum veðurfræðinga er áfram kuldi næstu daga.  Það verður komið fram undir mánaðarmót þegar tekur að hlýna á ný og þá er ekki spáð meiri hita en svona 8 gráðum.   Vorið hefur staðið í stað vikum saman og þegar það loksins kemur verður tæpur mánuður þangað til daginn tekur að stytta á ný.

En eitt er víst allir hafa nóg til að tala um. Veðrið er og verður daglega til umfjöllunar þangað til vorið hefur að alvöru innreið sína.

Stafrænar myndir

Mér er orðið ljóst fyrir nokkru að ég er ekki einn um það að koma ekki stafrænum myndum mínum á staði þar sem aðrir geta skoðað þær.  Hundruðum saman safnast þær upp á harða diskinum mínum.  Ég tek skorpu og skorpu í að fara í gegnum myndir í myndvinnsluforriti; eyða rauðum augum, breyta lýsingu og "kroppa" þær til.  En síðan eru bara myndirnar þarna. Sem betur fer eru þær nú í fartölvu svo ég get þegar mikið liggur við tekið tölvuna og farið með fram í stofu og sýnt gestum nýjustu myndirnar úr síðasta afmæli eða ferðalagi.  En einhvernveginn þá er maður ekki vanur því, og það er minna mál að setjast niður og fletta myndalbúmum heldur en að setja "show" á tölvu í gang fyrir gesti.

Þá verð ég að viðurkenna að ég hef áhyggjur af öllum þessum framförum í rafrænni gagnageymslu; mun ég t.d geta notað tölvu eftir 5 ár til að lesa CD gagnadisk ?  Tæplega.   Og hvað ef blessaði harði diskurinn minn hrynur nú (reyndar ekki líklegt ég er með ASUS) ?   Eina ráðið sem ég sé er að drullast til að skrifa myndirnar á CD disk og láta framkalla þær á gamla máttan, eða reyna að fjárfesta í perntara sem skilar sömu myndgæðum.  Já aftur til fortíðar til að redda sér.

Allavega maður þarf að hafa sig allan við í umsjón með þessum myndum.  Svo eru það gömlu vídeóspólurnar með fjölskyldumyndunum...en það er nátttúrulega saga í annað blogg.

Samkeppni

Ef maður ber saman vexti stærstu bankanna þriggja, sem reyndar er æði mikil vinna, er niðurstaðan að óverulegur munur er á kjörum þeirra.  Ef fengin eru tilboð í tryggingar frá tryggingafélögum kemur ekki í ljós mikill  munur, en samt er mjög flókið að bera tilboð tryggingafélaga saman.  Ef skoðuð er verðskrá stærstu olíufélaganna er óveruelgur munur á bensíni og olíu hjá þeim.  Ef bornar eru saman nokkrar vörutegundir í Bykó annarsvegar og Húsasmiðjunni hinsvegar finnst ekki mikill verðmunur.  Ef skoðuð er gjaldskrá Og vodafone og Símans finnst ekki mikill munur.  Næstum enginn munur er á gjaldskrá orkusölufyrirtækja á rafmagni og svo framvegis.

Ofangreindir þættir er stór sneið í neyslu hvers og eins og ekki hægt að velta því fyrir sér hversvegna ekki sé meiri samkeppni. Öll þessi fyrirtæki sýna góðan hagnað hvert einasta ár.  Að maður skuli treysta þeim til þess að vera með heiðalega álagningu og að maður skuli vera viss um að ekki sé verðsamráð -  slíkt hvarflar varla að nokkrum manni.  En samt líðst þetta ár eftir ár !

Áfengi og megrun

Samkvæmt þvi sem ég les er alkahól ein tegun orku, sem líkaminn vinnur úr.  Alkahólið er þar að auki yfirleitt umkringt sætum efnum ýmiskonar, sem verður oft að ljúffengum drykkjum t.d vínum eða bjór.  Þessvegna er áfengi ekki besti vinur þeirra sem vilja grenna sig eða eru stöðugt í aðhaldi til þess að fitna ekki.    Ég átta mig hinsvegar engan veginn á hversu mikill óvinur áfengið er heilsu manna út frá þessu sjónarhorni.  Ljóst er að hin hættan, þ.e hættan á fíkn eða tjóni ýmiskonar undir áhrifum er svo miklu sýnilegri og áþreyfanlegri heldur en offituþáttur í neyslu áfengis.   Eiginlega verður maður svolítið ruglaður við það að lesa texta um skaðsemi áfengis á megrunarkúra.

Ekki verður nú beinlínis sagt að það séu háværar raddir er vara við orkumagninu í áfengi, en þó er það svo að ýmsir framleiðendur setja á markað fitu- og hitaeiningasnauðara áfengi t.d bjór.  Það eru nú allmargir sem velja slíkt megrunaráfengi þegar þeir fá sér brjóstbirtu.  Já hitaeiningasnautt áfengi selst alltaf betur og betur.   Mun auðveldara er nú að vera úti að skemmta sér með áfengi  án þess að fitna um leið.   "Drekkum og grennumst" fer fljótlega að heyrast fjöllunum hærra.

Sumar & hiti

Fyrsti alvöru sumardagurinn er í dag hér á Selfossi.  Hitinn orðin svo hár á íslenskan mælikvarða að hægt er að vera úti án þess að fara í utanyfirhöfn.  Og  í kvöld koma allir þessir ljósu Íslendingar  meira eða minna rauðir inn úr birtunni.  Þol húðarinnar fyrir sól er með minnsta móti á Íslandi og þeir ekki alveg tilbúnir.   Ekki er enn búið að kaupa sólarvarnarkremið.

Þökk sé vísindum að til er sólarvörn, sem er bráðnauðsynleg vara meira eða minna allt sumarið.  Fyrir mig hinn ljósa mann er sólarvörn himnasending.  Sem barn brann ég og brann alla fergurstu sumardagana.  Notað voru þau krem sem til voru og sett Nivea að júgursmyrsli á brunan að kveldi. Næsta dag varð maður að vera í peysu upp í háls hversu gott sem veðrið kynni að vera.

 En núna getur maður leyft sér að sitja eða ganga  á góðviðrisdögum léttklæddur í sólinni.  Meira segja orðið pínulítið brúnn.   Já þökk sé blessuðum sólarvarnarkremunum öllum.